1. 'A vucchella
2. Silenzio cantatore
3. La Luisella
4. Lo marenaro
5. S'io fosse
6. Ammore 'nnucente
7. L'acquaiolo
8. Core 'ngrato/Chi tene 'o mare/Alleria
9. Napulitanata
10. Serenata napulitana
11. Nanassa
12. Indifferenza
13. E bonasera ammore
14. Palomma 'e notte
15. 'O surdato 'nnammurato
16. Llà ri llì rà
 
'A vucchela

Si' comm'a nu sciurillo...
tu tiene na vucchella,
nu poco pucurillo,
appassuliatella.
Méh, dammillo, dammillo,
è comm'a nu sciurillo...
dammillo nu vasillo,
dammillo, Cannetella!
Dammillo e pigliatillo
nu vaso...piccerillo
nu vaso...piccerillo
comm'a chesta vucchella
che pare na rusella...
nu poco pucurillo
appassuliatella...
Dammillo e pigliatillo
nu vaso...piccerillo
nu vaso...piccerillo
comm'a chesta vucchella
che pare na rusella...
nu poco pucurillo
appassuliatella...
Si' comm'a nu sciurillo...
nu poco pucurillo,
appassuliatella.

up

 

Silenzio cantatore

Zitta,
stanotte nun dicere niente:
cádeme 'mbraccia, ma senza parlá...
Dòrmono 'e ccose nu suonno lucente,
nu suonno 'e na notte d'está.

Marí',
dint''o silenzio,
- silenzio cantatore -
nun te dico parole d'ammore,
ma t''e ddice stu mare pe' me!...

Dimme:
stanotte si' tutta d''a mia?
St'uocchie tuoje belle
mme diceno 'e sí...
No, cu 'sta luna, nisciuna bucía
sta vócca buciarda pò ddí!...

Marí',
dint''o silenzio,
- silenzio cantatore -
nun te dico parole d'ammore,
ma t''e ddice stu cielo pe' me!...

up

 

La Luisella

Nce sta na giardenera,
se chiamma Luisella,
mme vene a ncojetà.
Nce tene no giardino
chino 'i rosamarina ...
Luisè sera e matina
non me venì a pprettare,
Luisè sera e matina non me venì a prettà.

Lo naso è profilato,
la vocca è n'arciulillo,
lo muso è russulillo,
na razia è lù parlà.
Doje schiocche janche e rosse
sta nchella faccia fina ...
Luisè sera e matina
non me venì a pprettare,
Luise sera e matina non me venì a prettà.

Luisè, si me te sposo
t'accatto li sciocquaglie;
lazziette a trenta maglie
te voglio fa piglià;
te piglio no corpetto,
purzì na manteglina ...
Luisè sera e matina
non me venì a pprettare,
Luisè sera e matina non me venì a prettà.

up

 

Lo marenaro

Tutt'abbampato, cuoto d'ammore,
da quarche ghiuorno stò a sosperà
Via mò, non darme, Retè, dolore!
via mò, non farme cchiù desperà.
Guarda la luna! s'auza lucente,
doce lo viento stace a scioscià.
Chest'è l'ora che l'arma ardente, Retè,
te pozzo tutta mostrà.
Vota! fa priesto! vien'a bbocà
a mmare nzieme volimmo stà.
Fa priesto, votta, votta
vien'a bbocà, votta, viene,
votta, votta, fa priesto,
vien'a bbocà,
a mmare nzieme volimmo stà...
a mmare nzieme volimmo stà.

Senza paura nuje ccà potimmo sta
sule sule co libertà.
Nterra qua bota si sule simmo,
purzi quarcuno nce pò apprettà.
Viene, te juro chisto delietto schitt'à
lo cielo mmidia pò dà...
ca quanto sente lo core mpietto soltanto
ncielo se pò provà.
Vota! fa priesto! vien'a bbocà
a mmare nzieme volimmo stà.
Fa priesto, votta, votta
vien'a bbocà, votta, viene,
votta, votta, fa priesto,
vien'a bbocà,
a mmare nzieme volimmo stà...
a mmare nzieme volimmo stà.

up

 

S'io fosse

S’io fosse ‘na viola
mo ‘mpietto a te starria
e tu nennella mia
vulisse bene a me

S’io fosse palummella
co tte comme a no sciore
‘mo faciarria ll’ammore
sulo co tte nenne’

Ma viola nun songho io
nun songho palummella
e tu nennella bella
tu nu vuo’ bene a me

S’io fosse n’auciello
‘mo ‘ncoppa a sta fenesta
facenno strille e feste
io cantarria pe tte>

S’io fosse po’ ‘na rosa
mmiezo a ‘ste trezze nere
te faciarria parere
la figlia de no rre.

nun auciello io songho
nun songho ‘na rosella
e tu nennella bella
tu nun vuo bene a mme...

up

 

Ammore 'nnucente

Napule mio se sceta
dint’a na festa ‘mpruvvisata ‘e sole
comme a na sposa fresca ‘e giuventù!
Comme vulesse addeventà poeta,
ma dint’ ’o core moreno ‘e pparole...
Resto ‘ncantato, comme rieste tu!

Ammore mio ‘nnucente
statte abbracciata a mme senza parlà
mo nun me ‘mporta ‘e niente!
Nun è nu suonno sta felicità!
Si bella comm’a Napule
e comm’a Napule nun può tradì!

Napule mio s’addorme
dint’a na sera fatta ‘e luna chiara
comme na mamma stanca d’aspettà!
Comme’ ‘e vulesse chesti stelle a chiorme
pe farte na cullana scicca e rara...
Ma sulo cu ‘o pensiero ‘ può afferrà!

Ammore mio ‘nnucente
statte abbracciata a mme senza parlà
mo nun me ‘mporta ‘e niente!
Nun è nu suonno sta felicità!
Si bella comm’a Napule
e comm’a Napule nun può tradì!

up

 

L'acquaiuolo

Dorme sta scellerata!
Quann’era ‘nnammurata
steva affacciata già.
“ ‘A limunata fresca!”
Mo dorme a scialacore
pecchè nun c’è l’ammore
ca, ‘a notte ‘a va a scetà.
“Chi vo’ vevere”
Me daie veleno amaro
me faie magnà ‘o limone,
maltratte a stu sciascione:
so tipo ‘a disprezzà?
“Neh, che bell’acqua fresca!”
Pe’ chesta capa sciacqua
aggio perduto ‘a mmù mmera.
“Che bell’acqua!”

Embè, ‘a scassasse ‘a faccia!
Chella mo nun s’affaccia,
pe’ farme amariggià.
“A limunata fresca!”
E ‘nfrisco me mantene:
ma è sango dint’ ‘e vvene,
acqua zurfegna, o che?
“Chi vo’ vevere!”
Mannaggia ‘o sole ‘austo
ca coce e ‘nfoca ‘e ccape.
Si tu mo piglie e arape,
t’ ‘a vengo a refriscà.
“ ‘A limunata fresca!”
E manco ‘a testa arracqua:
chi sa comme ‘a tene arza.
“Che bell’acqua!”

E io stongo ccà ‘a doje ore:
st’acqua se fatto broro
certo mo vullarrà.
“Ca chesta gela ‘e diente!”
Brutta, ‘nfama assassina,
ma comme, ogne matina
me viene a ‘ntussecà?
“Chi vo vevere!”
Meglio ca me ne vaco,
cu cù, tu lloco staie,
sto ccà, pecchè mo ffaie,
so tipo a disprezzà?
“Neh che bell’acqua fresca!”
E n’ommo po’ se stracqua.
Fattella co ‘o limone!
“Che bell’acqua!”

up

 

Core 'ngrato/Chi tene 'o mare/Alleria

Catarì, Catarí...
pecché mm''e ddice sti pparole amare?!
Pecché mme parle e 'o core mme turmiente Catarí'?!
Nun te scurdá ca t'aggio dato 'o core, Catarí'...
Nun te scurdá...
Catarí...
Catarí, che vène a dicere
stu pparlá ca mme dá spáseme?
Tu nun ce pienze a stu dulore mio?!
Tu nun ce pienze, tu nun te ne cure...
Core, core 'ngrato...
T'hê pigliato 'a vita mia!
Tutto è passato...
e nun ce pienze cchiù.

--------
Chi tene 'o mare
cammina ca vocca salata
chi tene 'o mare
'o sape ca è fesso e cuntento
chi tene 'o mare 'o ssaje
nun tene niente...

----------

Passa 'o tiempo e che fa
se la mia voce cambierà
passa 'o tiempo e nun te
cride cchiù
Voglio 'o sole pe' m'asciutta'
voglio n'ora pe' m'arricurda'.
Alleria pe' nu mumento
te vuo' scorda'
cha hai bisogno d'alleria
quant'haje sufferto
'o ssape sulo Dio.
E saglie 'a voglia d'allucca'
ca nun c'azzicche niente tu
vulive sulamente da'

up

 

Napulitanata

Uocchie de suonno, nire, appassiunate,
ca de lu mmèle la ducezza avite,
pecché, cu sti gguardate ca facite,
vuje nu vrasiero 'mpietto mm'appicciate?...

Ve manca la parola e mme parlate,
pare ca senza lacreme chiagnite,
de 'sta faccella janca ánema site,
uocchie belle, uocchie doce, uocchie affatate!...

Vuje ca 'nziem'a li sciure v'arapite
e 'nzieme cu li sciure ve 'nzerráte,
sciure de passione mme parite.

Vuje, sentimento de li 'nnammurate,
mm'avite fatto male e lu ssapite...
Uocchie de suonno, nire, appassiunate!

up

 

Serenata napulitana

Allèra e sulitaria,
strada 'e Pusilleco,
si' sempe tu!
Tutt''e ccanzone 'e Napule
pe' te ha cantato e canta 'a giuventù!
Viuline ca só' lacreme,
chitarre appassiunate...
Quanta suspire a 'e ffemmene
stu mare ha fatto fá...

Varche a cònnola ogne sera
sott''e ggrotte 'e Marechiaro...
Passa Ammore, ride e va...
mentre se sentono
parole e museca,
ca sulo Napule
sape cantá!...

Tesoro mio, che palpite
sott'a chist'arbere
pe' te vedé!
Cu 'sta faccella pallida
mo guarde 'a luna e triemme 'mbracci'a me...
Chist'uocchie mieje te chiammano...
"Vita d''a vita mia..."
Languide 'e tuoje rispònnono:
"Dimme che vuó'?...Stó' ccá!..."

Varche a cònnola ogne sera
sott''e ggrotte 'e Marechiaro...
Passa Ammore, ride e va...
mentre se sentono
parole e museca,
ca sulo Napule
sape cantá!...

Passa Ammore, ride e va...
mentre se sentono
parole e museca,
ca sulo Napule
sape cantá!...

up

 

Nanassa

Nanassa ammore quanno é ‘ntussecuso
ca’ notte e gghiuorno semmpe me pazzea
io faccio ammore all’angulo ‘e stu vico
cu na figliola ‘n’angelo e buntà
a gente m’hanno ditto statte accorta
ca’ ‘o nnammurato a me me vo assuccià

e io mo sto danno ‘a voce co’ fele ‘mponta ‘o musso
chi sa chi lascia ‘o russo stasera mmiezo cca

Nanasse faccio ammore ca figlia e ca’ mamma me spasso
tengo e cunfiette

Nanasse so’ doje sere ca’ ‘na rocchia
‘e mastugiorgie parlano a stu puntone
si vene ‘nfaccia a mme pure Sansone
e parla e Cuncettella, e ch’aggia fa
le mosto primma ‘nfaccia ‘a nasa e cane
e ‘a canna tosta ce a’ faccio assaggià

e io mo sto danno ‘a voce co’ fele ‘mponta ‘o musso
chi sa chi lascia ‘o russo stasera mmiezo cca

Nanassa e mmuzzarellone a nu’ sorde tengo e cunfiette
vengo stasera

Nanassa ‘mo ‘n’auciello ‘e mala nova
s’ha fatto ‘a casa ‘mmiezo a ‘stu quartiere
me sta dannanno ll’anema e ‘o penziero
ca’ chisto brutto segno vene a mme
io cerco ‘e no caccia ma ustinato
chillo me vene a di’ canta pe tte.

e io mo sto danno ‘a voce co’ fele ‘mponta ‘o musso
chi sa chi lascia ‘o russo stasera mmiezo cca

Nanasse tengo ‘e cunfiette pe’ chi fa amore vengo stasera.

up

 

Indifferenza

Nun mme canusce cchiù?...Pecché ch'è stato?...
A me mme pare ca só' tale e quale!
Nun só' cchiù ardente comme p''o ppassato
ma, certamente, nun te voglio male!...
Primma mme 'ntussecavo 'a vita mia
e mo mm''a piglio cu filosofía...

Cade 'o munno?
E che mme 'mporta?!
More 'a gente?
E ch'aggi''a fá!?...
Si' scuntenta?
E chell'è 'a porta...
Si' cuntenta?
E statte ccá!
Va' gioja bella...
Nun mme 'mporta 'e niente:
Io mme só' fatto
'o primmo 'ndifferente!

E pássate na mano p''a cuscienza
e penza a quanta tuósseco mm'hê dato!...
Dice: "Ma mo ched è st'indifferenza?"
"E' forse 'o segno ca mme só' stracquato!"
Si 'o pugne cu na spíngula stu core...
io credo ca nun sente cchiù dulore.

Cade 'o munno?
E che mme 'mporta?!
More 'a gente?
E ch'aggi''a fá!?...
Si' scuntenta?
E chell'è 'a porta...
Si' cuntenta?
E statte ccá!
Va' gioja bella...
Nun mme 'mporta 'e niente:
Io mme só' fatto
'o primmo 'ndifferente!

T'odio? E pecché? Sarría troppa fatica...
Po' che mm'hê fatto?...Nun mm'hê fatto niente!
Mo faccio 'o cunto ca tu si' n'amica
ca voglio bene 'ndifferentemente!...
'O bbi' st'ánema mia ch'è addeventata?
Eppure quanto...quanto t'aggio amata!

Cade 'o munno?
E che mme 'mporta?!
More 'a gente?
E ch'aggi''a fá!?...
Si' scuntenta?
E chell'è 'a porta...
Si' cuntenta?
E statte ccá!
Va' gioja bella...
Nun mme 'mporta 'e niente:
Io mme só' fatto
'o primmo 'ndifferente!

up

 

E bonasera ammore

E vienetenne Ammore, e vienetenne...
mo, cu 'a schiuppata 'e primmavera, scinne...
dint''e nnuttate ca nun tengo suonno...
Dimme ca chesta nun è chella 'e tanno,
ch'è 'a cchiù sincera femmena d''o munno
e ca, sinceramente, sta aspettanno...

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

E s'è addurmuto, Ammore, e s'è addurmuto
stu core mio ca fuje maletrattato...
E ca tu cante storie? Nun se sceta!
E ca tu dice comm'a ll'ati vvote:
Nun è Crestina...nun è 'Mmaculata...
Dorme stu core mio, male capito...

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

E bonasera, Ammore, e bonasera!
E va' a fá 'o ruffianiello a n'atu core...
Quanno c'è stato chi mm'ha ditto: "Giuro
ca nun te lasso manco quanno moro..."
E mm'ha lassato cu na vocca amara...
Fall'aspettá 'sta nénna ca suspira...

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

E vienetenne Ammore, e vienetenne...
mo, cu 'a schiuppata 'e primmavera, scinne...
dint''e nnuttate ca nun tengo suonno...
Dimme ca chesta nun è chella 'e tanno,
ch'è 'a cchiù sincera femmena d''o munno
e ca, sinceramente, sta aspettanno....

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

E s'è addurmuto, Ammore, e s'è addurmuto
stu core mio ca fuje maletrattato...
E ca tu cante storie? Nun se sceta!
E ca tu dice comm'a ll'ati vvote:
Nun è Crestina...nun è 'Mmaculata...
Dorme stu core mio, male capito...

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

E bonasera, Ammore, e bonasera!
E va' a fá 'o ruffianiello a n'atu core...
Quanno c'è stato chi mm'ha ditto: "Giuro
ca nun te lasso manco quanno moro..."
E mm'ha lassato cu na vocca amara...
Fall'aspettá 'sta nénna ca suspira...

Dimme chello ca vuó'...
canta comme vuó' tu,
ma io nun te credo, no,
ma io nun ce 'ncappo cchiù!

up

 

Palomma 'e notte

Tiene mente 'sta palomma,
comme gira, comm'avota,
comme torna n'ata vota
sta ceròggena a tentá!
Palummè' chist'è nu lume,
nun è rosa o giesummino...
e tu, a forza, ccá vicino
te vuó' mettere a vulá!...

Vatténn''a lloco!
Vatténne, pazzarella!
va', palummella e torna,
e torna a st'aria
accussí fresca e bella!...
'O bbi' ca i' pure
mm'abbaglio chianu chiano,
e che mm'abbrucio 'a mano
pe' te ne vulé cacciá?...

Carulí', pe' nu capriccio,
tu vuó' fá scuntento a n'ato...
e po' quanno ll'hê lassato,
tu, addu n'ato vuó' vulá...
Troppi core staje strignenno
cu sti mmane piccerelle;
ma fernisce ca sti scelle
pure tu te puó' abbruciá!

Vatténn''a lloco!
Vatténne, pazzarella!
va', palummella e torna,
e torna a st'aria
accussí fresca e bella!...
'O bbi' ca i' pure
mm'abbaglio chianu chiano,
e che mm'abbrucio 'a mano
pe' te ne vulé cacciá?...

Torna, va', palomma 'e notte,
dint'a ll'ombra addó' si' nata...
torna a st'aria 'mbarzamata
ca te sape cunzulá...
Dint''o scuro e pe' me sulo
'sta cannela arde e se struje...
ma ch'ardesse a tutt'e duje,
nun 'o ppòzzo suppurtá!

'O bbi' ca i' pure
mm'abbaglio chianu chiano,
e che mm'abbrucio 'a mano
pe' te ne vulé cacciá?...

up

 

'O surdato 'nnammurato

Staje luntana da stu core,
a te volo cu 'o penziero:
niente voglio e niente spero
ca tenerte sempe a fianco a me!
Si sicura 'e chist'ammore
comm'i só sicuro 'e te...

Oje vita, oje vita mia...
oje core 'e chistu core...
si stata 'o primmo ammore...
e 'o primmo e ll'ùrdemo sarraje pe' me!

Quanta notte nun te veco,
nun te sento 'int'a sti bbracce,
nun te vaso chesta faccia,
nun t'astregno forte 'mbraccio a me?!
Ma, scetánnome 'a sti suonne,
mme faje chiagnere pe' te...

Oje vita, oje vita mia...
oje core 'e chistu core...
si stata 'o primmo ammore...
e 'o primmo e ll'ùrdemo sarraje pe' me!

Scrive sempe e sta' cuntenta:
io nun penzo che a te sola...
Nu penziero mme cunzola,
ca tu pienze sulamente a me...
'A cchiù bella 'e tutt''e bbelle,
nun è maje cchiù bella 'e te!

Oje vita, oje vita mia...
oje core 'e chistu core...
si stata 'o primmo ammore...
e 'o primmo e ll'ùrdemo sarraje pe' me!
Oje vita, oje vita mia...
oje core 'e chistu core...
si stata 'o primmo ammore...
e 'o primmo e ll'ùrdemo sarraje pe' me!

up

 

Llà ri llì rà

ll’ammore passa comme passa ‘o viento
te vasa pe ‘na vota e niente cchiù
tira a campà nun suffri
nun te lagnà
nun ce penzà ca’ ll’uocchie chiagneno
lla ri lli rà lla ri lli ra

ll’ammore te l’ha fatto ‘o tradimento
nun era comme te sunnave tu
‘n’ammore a ccà n’ato a llà
te può spassa’
che ce vuo fa si ll’uocchie chiagneno
‘o tiempo va se po scurda
penza a cantà lla ri lli rà

up

 
 
Discografia Spettacoli Dicono... Fotografie Video Contatti Links Nuova Compagnia di Canto Popolare GIANNI LAMAGNA :: Sito Ufficiale Di Musica in Musica Contatto webmaster